八宝辣酱，听名字侬可覅认为是一种酱，实际浪搿是一道经典个上海传统本帮菜，顾名思义菜个配料里有八样宝，四荤四素，搭配得当，四荤是鸡丁、鸭肫丁、猪肉丁、猪肚丁；四素为花生、笋丁、豆腐干丁搭香菇丁。伊用料多样，口感丰富，葛咾邪气受欢迎。
上海人欢喜吃迭只菜，自家勒屋里也会得做，但是自家做起来要准备八样配料有点麻烦，而且过去大家经济条件侪一般，有个配料只有过年过节再会得买，乃末上海姆妈们就去脱几样准备起来勿大便当个，或者价格贵个，根据自家个偏好配几样简单个、家常个原料，譬如猪肉丁、茭白丁、豆腐干丁、花生米，迭能介就演变成了简易版个家常辣酱。
迭道菜烧起来便当，准备材料可是邪气花功夫个，每样菜侪要汏好切好，花生米要事先泡好，拣去霉变个，剥脱外衣，用温油氽熟；猪肉丁要先用生粉浆一浆；茭白丁要搭肉丁切成功一样大小；豆腐干最好买香干，上海人总归欢喜讲究搿种细节，勒贫乏个岁月里也要尽力拿日子过得老精致。
烧家常辣酱还有一只老重要个配料就是酱，虽然伊叫辣酱，但是上海人是勿擅长吃辣个，所以还是以甜面酱为主，稍为摆一小勺辣酱，搿能介烧出来个味道甜、咸、辣、鲜兼而有之。
过去上海人要买做家常辣酱个原料甜面酱、豆瓣酱、辣火酱侪是拿一只碗去酱油店里买个，上海人称之为“拷”，拷个含义是散装零买，现吃现买，此外还有拷酱油、拷菜油咾啥，需要几化拷几化，一眼勿浪费，而且价格也便宜，搿能比较经济实惠。
家常辣酱是上海人餐桌浪个一道传统菜肴，姆妈们一般一次性侪会得多烧一眼，储藏勒玻璃瓶里慢慢叫吃。勿管是当小菜下饭，还是作为面浇头，甚至搭配淡馒头，侪刮刮叫个。
一道家常辣酱，可以勾起交关人对一个年代个记忆。家常辣酱里个伊眼原料现在看来一眼也勿稀奇，但是勒计划经济年代里却是紧俏商品，特别像冬笋、花生平常勒市场浪看大勿到。物以稀为贵，于是家庭主妇就拿搿些好物事做成功辣酱，又咸又辣，又好吃又勿能多吃，而勿能多吃就会更加想吃。
当年个知青们探亲结束返回农场辰光，除脱仔炒麦粉，板定会再带几罐家常辣酱回去慢慢叫吃，知青们勒农村，吃着搿眼从屋里带得来个“宝贝”，往往会想起远勒上海个家搭姆妈个手艺。
现在条件好了，家常辣酱又慢慢叫向八宝辣酱靠拢了。冬笋上市季节多买几只汆熟了摆勒冰箱里冷冻，搿能介一年四季侪可以吃到笋丁。讲究营养个会摆点胡萝卜丁，讲究颜色丰富个可以摆点青豆，虾仁是必须个，摆了虾仁再显得有档次，甚至还有人会摆干贝，搿更加是提升了鲜度。
看到此地，侬阿会勒想，今朝夜里要加一道菜了呢？
