老上海人欢喜吃糕搭仔团子，街浪向有交关糕团店，勒勒阿拉国家个宋朝就有搭专门卖糕团个糕团铺，听说讲古代卖糕团搭仔买点心是分开个，有人研究认为勒勒宋朝，糕团铺子里向个糕团搭仔现在流行个下午茶最相配，现代日本京都个糕团铺也卖煎茶搭仔抹茶，当然也有糕团、点心混卖个店家。糕团以甜个糕团为主打产品，清朝以后上海、日本神户个糕团店出现咸个产品，糕团搭仔馄饨、面条等点心开始混搭出售，旧上海有些糕团店勿卖面条、馄饨。后来再发展成糕团点心店既卖糕团又卖面条、大饼、羌饼等点心，单一经营糕团个店少脱了交关。
为啥“糕”大多数侪是方个，糕是实心，“团（子）”是圆个，老多侪有馅头个，原来中国古代有“天圆地方”之说，大地广懋，实实墩墩，天空空荡，包罗万象，一糕一团，就囊括了天与地个全部精华，仔细想想，老上海个“糕团”两个字，是邪气有禅意个。
上海糕团传承苏州糕团个特色，色彩鲜艳，有大红、翠绿、嫩黄、淡紫、雪白、玫瑰等。有个使用天然植物汁制作糕团，绿个用麦叶，白个用莲子，黑个用芝麻，黄个用桂花，红个用玫瑰花，咖啡色个用可可粉，味道有甜有咸有椒盐，馅头以玫瑰、白糖、薄荷、枣泥、豆沙为传统特色。老上海糕团色、香、味蛮文雅别致个。时令青团，用小麦叶汁配色，色泽青绿，清香扑鼻，拨人以视觉美，味觉美个享受。
为啥上海人欢喜吃糕团呢，原来上海市区个人大多数侪来自浙江、苏南地区，江南苏州、无锡、常州、宁波、绍兴、昆山、青浦、松江出产个优质糯米、大米，特点是檽软香，交关人侪喜欢吃农家传统制作个食品，搿些用米粉、糯米粉制作个年糕、米糕、团子侪邪气好吃。就像阿拉爷，从前就喜欢吃米糕、糯米糕、赤豆糕、糖年糕、汤圆等糕团。所以最早住勒老上海石库门里向个苏州、无锡太湖一带个上海人，伊拉讲起闲话来侪是轻声轻气、又软又甜个，我想，大概是因为香糯个糯米糕团吃勒比较多伐？
1961年是食品短缺个年代，有个礼拜天上半天，我爷拨了我1块洋钿， 叫我到大世界对面个糕团店去买赤豆糕，走近一看，排队个人把旁边个弄堂挤得水泄不通，几百人个队伍一眼望勿到边。我排了2个钟头再刚刚“抢”到五分洋钿一块个赤豆糕10块，伊个辰光要吃块糕真个是勿容易啊。
史料记载，咸丰八年(1858年)上海开设第一家糕团店“五芳斋”，勒山西路盆汤弄附近、杨家坟山处。光绪十五年(1889年) 方斜路98号开设周福兴糕团店。宣统元年(1909年) 老城区乔家栅路41号开设永茂昌点心店，专营汤团、粽子等点心，尤其有名个是伊拉首创个“糯沙圆”。1950年上海糕团点心业：由糕团铺、点心店及锡帮面馆混合组成，共有会员单位439家。其中糕团铺占45%……1956年上海饮食业有：酒菜、西菜咖啡、厨房、糕团点心、面团、油饼馒头、粥店、茶楼、熟水等9个自然行业。可见糕团搿一块也是上海点心个重头戏之一。
讲到糕团，我记得“淮国旧”南面个沧浪亭点心店，经营苏式糕团、面点，名气老响个，自产自销苏式四时糕点，以软糯、香甜、馅多而闻名。1980年，玫瑰寿桃、松糕拨评为市商业二局优质产品。重糖豆沙青团、条头糕为名特点心搭仔产品。1991年，柠檬素油年糕搭仔百果松糕拨评为国家商业部优质产品金鼎奖。
上海糕团做得好个店家还有美新宁波汤团店，皮薄馅足，吃口细腻、滑爽，糯而勿粘，邪气有宁波风味搭仔特色。沈大成糕团点心店个条头糕、双酿团、金团最好吃。
老底子过年辰光，上海人家跑亲眷侪欢喜带一大块圆个猪油蒸糕贴一张代表吉祥个大红纸头送礼。逢年过节侪要互相赠送糕团，谐音高高兴兴，表示祝贺。记得我外婆自家蒸个猪油百果松糕，用糯米、粳米镶起来磨粉，加赤豆、莲心、蜜枣、蒲桃、松子、猪油咾啥一道蒸，糕里向假使呒没雪雪白个猪油，就要失脱交关魅力搭仔味道。
申城糕团店好吃个糕团还有赤豆糕、糖年糕、糯米糕、枣泥糕、核桃糕、黑米糕、玉米糕、定胜糕、寿桃、奶香年糕团、方糕、马拉糕、油煎年糕、桂花拉糕、大富贵条头糕、双酿团、绿豆糕、薄荷糕、米枫糕、黄松糕、豇豆糕、寿糕、香蜜糕、红龟糕等等。
金团有两种，一种是糯米粉做个，里向豆沙，外表滚了松花粉，是黄个，松花粉是松树开花辰光个粉末，到清明节令，山浪向松树开花个辰光动手去采。还有一种青金团，是勒用艾草汁加糯米粉制作个豆沙青团外头滚一层松花粉。滚了松花粉个青团相互勿粘连，存放、带走侪便当。
双酿团老有劲个，有两层馅子，里向是豆沙、外头是黄豆粉或椰丝、花生、芝麻、蒲桃咾啥馅头，吃脱外层，再吃里向，味道各勿相同，小朋友最欢喜了。条头糕4分洋钿一条，用雪白个糯米粉做个，高头洒金黄颜色个糖桂花，邪气弹眼落睛，从头吃到底，侬会发现里向装满了细细甜甜个豆沙，又香又甜又糯，哈哈，我可以一口气吃脱两条。沈大成有种三丁糍米团，用糍米包裹肉丝、冬笋、木耳、香菇、青菜等咸鲜味，农家本色，别有风味。
上海人欢喜吃个糖糕像只元宝，做好以后摆勒油锅里向氽，氽到黄褐色捞起来个辰光还在吱吱响，4分洋钿一只，沉甸甸个，咬一口满嘴巴是油，香甜可口，了食品亏乏个岁月里，一只糖糕下肚，夜饭也吃勿落了，是从前学堂放学以后小学生最欢喜个。
上海周边七宝、南翔、朱家角、南汇、宝山等古镇用当地糯米、大米做成功个各式糕团品种特别多，各种各样馅子：桂花、枣泥、豆沙、果仁、南瓜等等。糕团形状不一，有方个、圆个、长条形个，吃一口蛮有嚼劲，香香软软，甜甜蜜蜜，拨阿拉个生活带来了幸福美满个享受。
